Генэральны сакратар Рады Эўропы Турб’ерн Ягланд вітаў правядзеньне ва Ўкраіне 26 кастрычніка парлямэнцкіх выбараў. «Хоць канчатковыя вынікі яшчэ невядомыя, сёньняшнія выбары былі выразным выказваньнем імкненьня ўкраінскага народу да міру, дэмакратыі і адзінства краіны», — адзначыў Ягланд. «Я вітаю цьвёрдую прыхільнасьць прэзыдэнта Парашэнкі і прэм’ер-міністра Яцанюка да дэмакратычных рэформаў, ухваленую большасьцю выбарцаў», — дадаў генэральны сакратар Рады Эўропы. Старшыня камітэта Эўрапарлямэнту па замежных справах Эльмар Брок заявіў, што вынік выбараў ва Ўкраіне мае вялікае значэньне для ўкраінскай дэмакратыі і станаўленьня прававой дзяржавы.
"Выбары дазволяць правесьці працэс трансфармацыі, неабходны для таго, каб зрабіць Украіну сучаснай і пасьпяховай краінай. Думаю, цяпер у парлямэнце для гэтага ёсьць гарантаваная большасьць. Гаворка ідзе аб партыях, якія падтрымліваюць праэўрапейскія працэсы«,— заявіў Брок.
«Вырашальную ролю гуляе той факт, што большасьць атрымалі дэмакратычныя партыі. Вынікі выбараў — гэта адмова ад лева- і праварадыкальных партый, гэта выбар на карысьць праэўрапейскіх сіл, на карысьць дэмакратыі. Гэта пакладзе канец размовам пра фашызм ва Ўкраіне, паколькі гэтыя партыі не гуляюць ніякай ролі. Я думаю, што гэта грандыёзная перамога дэмакратыі», — заявіў Брок, якога цытуе УНІАН
Раней лідэр расейскай апазыцыі Барыс Нямцоў таксама павіншаваў украінцаў з эўрапейскім выбарам.
