Дзень у гісторыі
9 траўня 1945 году на жаданьне Сталіна ў Бэрліне быў паўторна падпісаны Акт капітуляцыі Нямеччыны ў Другой сусьветнай вайне з удзелам прадстаўнікоў Савецкага Саюзу.
З гэтай прычыны Дзень Перамогі ў краінах савецкага блёку адзначаўся менавіта 9 траўня, а ня днём раней, як у астатнім сьвеце.
Таксама ў гэты дзень
1502 — Хрыстафор Калюмб выяжджае з Кадзісу ў сваё чацьвёртае падарожжа ў Новы Сьвет.
1633 — новаабраны кароль Рэчы Паспалітай Уладзіслаў IV з-пад Варшавы павёў войска на дапамогу абложанаму Смаленску.
1794 — на рынку перад ратушай у Варшаве павешаныя Юзаф Забела і Юзаф Касакоўскі, дзяржаўныя дзеячы ВКЛ, якія здрадзілі паўстаньню на карысьць расейскага войска.
1917 — заснаваная Беларуская Народная Грамада, дзейнічала ў Расеі сярод ураджэнцаў Беларусі.
1929 — пачала працаваць камісія ЦК ВКП(б) па вывучэньні практыкі правядзеньня новай нацыянальнай палітыкі ў БССР
1950 — утварылася Эўрапейская супольнасьць вугалю і сталі (прадвесьнік Эўрапейскага зьвязу). У памяць аб гэтым дні сёньня ў краінах Эўразьвязу адзначаюць Дзень Эўропы.
1953 — у Менску выйшаў першы нумар літаратурнага часопіса «Маладосць».
1994 — Нэльсан Мандэла стаў першым чарнаскурым прэзыдэнтам Паўднёвай Афрыкі.
У гэты дзень нарадзіліся
1837 — нямецкі прамысловец Адам Опэль, які заснаваў аднайменную аўтамабільную фірму.
1866 — у Горадні нарадзіўся тэатральны мастак Леў Бакст. Пасьля бальшавіцкае рэвалюцыі ён, як і многія ягоныя калегі, пераехаў у Парыж, дзе працы Бакста карысталіся вялікім посьпехам, а сам ён шчасьліва дажыў да старасьці.
1892 — на Мядзельшчыне нарадзіўся гісторык і этнограф Міхал Мялешка. Ягоная кар’ера завяршылася з пачаткам сталінскіх рэпрэсіяў, яшчэ ў 1930-м годзе. Арышты і ссылкі скончыліся ўрэшце паведамленьнем: пасьля 1940 году лёс вучонага невядомы. Засталіся працы Міхала Мялешкі, адна зь якіх — «Камень у вераваньнях і паданьнях беларусаў».
1913 — Васіль Івашын, беларускі літаратуразнаўца, пэдагог.
1929 — Людвіг Асецкі, беларускі графік.
1941 — Леанід Давідзенка, скульптар, жывапісец, графік.
У памяці
1794 — Юзэф Казімер Касакоўскі, дзяржаўны дзяяч Рэчы Паспалітай, біскуп інфлянцкі.
1805 — Фрыдрых Шылер, нямецкі паэт і драматург.
1891 — Адам Станіслаў Красінскі, віленскі біскуп, прапаведнік, філёляг, паэт, перакладчык.
2012 — Уладзіслаў Пятрайціс, каталіцкі сьвятар у Мёрах.
2014 — Давід Сімановіч, паэт, празаік, перакладнік.
