У Варшаве плянуюць правесьці выставу да 60-годзьдзя Алеся Пушкіна, зьбіраюць сродкі

Ад аўтараў чакаюць творы на тэму выгнаньня, страты, пошуку каранёў, унутранай свабоды, памяць, рытуалу і побыту.

Уваход будзе бясплатным, але каб праект ажыцьцявіўся, ідзе збор сродкаў на плятформе gronka.org.

«Што такое свабода, калі ты далёка ад дому? Гэтае пытаньне лягло ў аснову выставы, якую рыхтуем мы, незалежная каманда беларусаў і беларусак у Варшаве. Мы зьбіраем творы, што намацваюць тэмы міграцыі, памяці, рытуалу ў візуальным мастацтве, інсталяцыях і пэрформансах. Выстава натхнёна постацьцю Алеся Пушкіна, але выходзіць за межы яго біяграфіі — гэта плятформа для сучасных творцаў, якія жывуць і думаюць у руху», — пішуць арганізатары.

Адначасова каманда рыхтуе выданьне альбома твораў Алеся Пушкіна, вядзе ягоны архіў і стварыла старонку памяці мастака.

ГЛЯДЗІЦЕ ТАКСАМА:

Алесь Пушкін — «Чалавек Cвабоды – 2023»

Хто такі Алесь Пушкін

Алесь Пушкін быў адным зь яскравых беларускіх мастакоў і пэрформэраў апошніх дзесяцігодзьдзяў. Пушкін жыў у мястэчку Бобр у Крупскім раёне, удзельнічаў у мастацкіх і палітычных акцыях з канца 1980-х. Яшчэ ў 1988 годзе яго арыштавалі на пяць дзён за распаўсюд улётак да Дзядоў.

На Дзень Волі 1989 году, яшчэ пры СССР, Пушкін выйшаў з плякатам «Досыць сацыялістычнай, адродзім незалежную Беларусь». Так студэнт тэатральна-мастацкага інстытуту прайшоўся па цэнтральным праспэкце Менску. За тую акцыю мастак атрымаў два гады ўмоўна, на суд прыйшоў у вышыванцы і адказваў на пытаньні па-беларуску.

У 1999 годзе Пушкін правёў пэрформанс каля будынку адміністрацыі прэзыдэнта, куды прывёз тачку з гноем і партрэтам Лукашэнкі, які праткнуў віламі, вываліўшы гной. І за гэтую акцыю Алесь быў пакараны двума гадамі ўмоўна.

У 2020 годзе Пушкін падтрымаў пратэсты. Яго схапілі і пабілі, як і іншых удзельнікаў акцый. Выйшаўшы з ізалятара, ён паказаў сінякі на сваім целе.

Крымінальную справу на Пушкіна завялі за партрэт дзеяча антысавецкага супраціву Яўгена Жыхара, угледзеўшы ў гэтым творы «рэабілітацыю нацызму».

Пушкін мог застацца за мяжой — бо ў той час, калі даведаўся пра крымінальную справу, быў у Кіеве, — але вырашыў вярнуцца ў Беларусь. За карціну мастаку прысудзілі 5 гадоў зьняволеньня. У апошнім інтэрвію на волі ён казаў, што ў Беларусі будзе ў турме, але застанецца пры гэтым жывы.

Пушкін прайшоў праз вайну, ён служыў у войску ў Афганістане. Апошнім часам зьняволеньне адбываў у турме ў Горадні. Там яму і стала блага са здароўем. Пушкін памёр у шпіталі ад прабадной язвы, дапамогу яму аказалі запозна. Пахаваны ў сваім родным Бабры.

ГЛЯДЗІЦЕ ТАКСАМА:

Зьявіліся сайт і Instagram-старонка памяці Алеся Пушкіна