Былы дырэктар кнігавыдавецтва «Кнігазбор» Генадзь Вінярскі напісаў у фэйсбуку, што з 2021 году меў справы, імаверна, з усімі «праваахоўнымі і кантрольнымі органамі» Беларусі. У ГУБАЗіКу яму вярнулі канфіскаваны раней наклад кнігі Віктара Марціновіча «Рэвалюцыя».
Увесь наяўны наклад раману — 558 асобнікаў — канфіскавалі ў выдавецтве «Кнігазбор» 4 студзеня 2021 году падчас ператрусу. Тады забралі нават бракаваныя экзэмпляры.
З таго ж часу беларуская мытня перастала прапускаць за мяжу пасылкі з раманам.
Але ў выніку ў ГУБАЗіК не знайшлі ў кнізе ніякага «экстрэмізму», і кнігу вярнулі Генадзю Вінярскаму.
- 26 студзеня 2023 году дырэктар выдавецтва «Кнігазбор» Генадзь Вінярскі паведаміў на сваёй старонцы ў фэйсбуку, што здаў у Міністэрства інфармацыі пасьведчаньне выдаўца:
- «Вось і скончылася мая эпапэя выдаўца. 27 гадоў працы, каля 3 тысяч найменьняў кніг, прэзэнтацыі, выставы».
- Выдавецтва «Кнігазбор» было зарэгістравана ў 2006 годзе, дырэктарам быў Генадзь Вінярскі, галоўным рэдактарам — Кастусь Цьвірка.
