Аляксандар Камароўскі - ляўрэат прэміі Юрыя Захаранкі
Уручэньне прэміі заплянаванае на 23 лютага ў офісе Партыі БНФ у Менску. Ляўрэатам прэміі імя Юрыя Захаранкі па выніках 2009 году стаў сустаршыня аргкамітэту ў справе стварэньня руху вэтэранаў баявых дзеяньняў у Аўганістане "Абаронцы Айчыны" Аляксандар Камароўскі.
Прэмія ўручаецца штогод дэмакратычным рухам, які яднае афіцэраў - былых супрацоўнікаў праваахоўных органаў і іншых сілавых структураў Беларусі, паведаміў БелаПАН адзін з заснавальнікаў прэміі праваабаронца Алег Воўчак.
"Аляксандр Камароўскі – рулявы "аўганскага" руху ў краіне. Арганізацыю па абароне правоў інвалідаў - удзельнікаў вайны ў Аўганістане ён пачаў ствараць яшчэ ў часы СССР, 20 гадоў таму. І да гэтага часу ён займае актыўную грамадзянскую пазыцыю, абараняючы правы войнаў-"аўганцаў". Мы лічым, што ён паказвае прыклад, якім павінен быць сапраўдны афіцэр, няхай нават і ў адстаўцы. (…) Летась ён актыўна ўступаўся за свайго калегу, таксама вэтэрана вайны ў Аўганістане, Мікалая Аўтуховіча, які цяпер знаходзіцца ў сьледчым ізалятары. І ў немалой ступені дзякуючы яму пра справе Аўтуховіча ведаюць многія "аўганскія" арганізацыі за мяжой ", - кажа Воўчак.
У розныя гады ляўрэатамі прэміі імя Захаранкі былі:
генэрал Валеры Фралоў;
праваабаронца Гары Паганяйла;
былы кандыдат у прэзыдэнты Аляксандр Казулін;
прадпрымальнік Мікалай Аўтуховіч;
журналіст Аляксандр Тамковіч.
Юры Захаранка
Юры Захаранка
Былы міністар унутраных справаў Беларусі, апазыцыйны палітык. Зьнік 7 траўня 1999 году пры нявысьветленых абставінах.
Юры Захаранка нарадзіўся 1 студзеня 1952 году ў мястэчку Васілевічы, Рэчыцкі раён. У момант, калі Беларусь атрымала незалежнасьць, Захаранка быў намесьнікам старшыні міжрэгіянальнага аддзелу па барацьбе з арганізаванай злачыннасьцю МУС СССР.
28 лiпеня 1994 году ўказам прэзыдэнта Аляксандра Лукашэнкі № 11 прызначаны міністрам унутраных справаў Беларусі.
16 кастрычніка 1995 году ўказам Лукашэнкі № 424 звольнены з пасады міністра ўнутраных справаў.
16 красавіка 1996 году ўказам Лукашэнкі № 149 паніжаны ў званьні да палкоўніка й звольнены зь Міністэрства ўнутраных справаў.
Захаранка далучыўся да апазыцыі й быў абраны ў склад кіраўніцтва Аб’яднанай грамадзянскай партыі. Выкрадзены ўвечары 7 траўня 1999 году.
Паводле словаў палітычнага эмігранта й былога начальніка СІЗА № 1 Алега Алкаева, Юры Захаранка быў выкрадзены, а пасьля гэтага расстраляны на загады людзей, набліжаных да Аляксандра Лукашэнкі. Сям’я Юр’я Захаранкі — жонка, дзьве дачкі і ўнукі — жывуць у Нямеччыне, дзе атрымалі палітычны прытулак.
