Аб стварэньні духоў у сваім тэлеграм-канале паведаміў старшыня Берасьцейскага гарвыканкаму Аляксандар Рагачук.
Водар будзе называцца «Брэст». Склаў яго Ўлад Ракуноў, вучань Сафіі Ходаш-Гройсман — адной з самых тытуляваных парфумэрак сьвету. У майстэрні Рэкунова стваралі духі для францускіх зорак эстрады Патрысіі Каас і Мірэй Мацье.
Першапачаткова для гораду Ракуноў прыдумаў шэсьць варыянтаў водараў. Зь іх адмысловая камісія выбрала «самы ўражлівы».
— Духі распрацоўваліся пасьля апусканьня аўтара ў гісторыю і культуру Берасьця, — адзначыў Аляксандар Рагачук. — Піраміда водару «Брэст» унікальная.
Прэзэнтацыя духоў адбудзецца на парфумэрным шоў, якое пройдзе ў Дзень гораду — 28 ліпеня. Цяпер дызайнэры распрацоўваюць для парфумы арыгінальныя флякон і пакаваньне.
— Прысьвячаць водары гарадам — тэма для сусьветнай парфумэрыі ня новая. Варта ўзгадаць такія духі, як Paris ад Yves Saint Laurent, Tokyo ад Kenzo, Roma ад Laura Biagiotti, London ад Burberry і гэтак далей , - напісаў Рагачук. — У Беларусі няма парфумаў, прысьвечаных гарадам, таму ў гэтай сфэры «Брэст» і як горад, і як парфума будзе першай!
