У 2024 годзе па статус уцекача ў Ізраілі зьвярнулася 159 грамадзян Беларусі, паведамляе сайт newsru.co.il з спасылкай на Ўпраўленьне народанасельніцтва і міграцыі.
У параўнаньні з 2023 годам, калі з адпаведным прашэньнем зьвярнулася 688 беларускіх грамадзян, колькасьць скарацілася на 76,9%.
Агулам летась статус уцекача ў Ізраілі папрасілі 6097 замежнікаў, беларусы склалі 2,6% просьбітаў.
Сярод тых, хто зьвярнуўся па ўцякацтва, таксама былі грамадзяне Расеі (700), Індыі (580), Малаві (528), Шры-Ланкі (508), Кітаю (276), Кеніі (249), Калюмбіі (242), Этыёпіі (240), ПАР (210), Малдовы (200), Узбэкістану (199), Турэччыны (161) ды інш.
Паводле даных профільнага ўпраўленьня, у 2024 годзе памежная служба Ізраілю адмовіла ва ўезьдзе 10 371 замежніку, у тым ліку 384 грамадзянам Беларусі (3,7%).
Адмовы таксама атрымлівалі грамадзяне Расеі (2.244), Украіны (1.430), Грузіі (1.222), Ярданіі (489), ЗША (487), Малдовы (467) ды інш.
ГЛЯДЗІЦЕ ТАКСАМА: «Хачу працягваць далей». Як 10-гадовая беларуска стала мэдалісткай чэмпіянату Ізраілю ў гімнастыцы