Улады Азэрбайджану накіравалі расейскаму боку паведамленьне аб спыненьні дзейнасьці агенцтва «Россотрудничество» на азэрбайджанскай тэрыторыі.
Як паведаміла азэрбайджанскае выданьне Report з спасылкай на паінфармаваныя крыніцы, «Азэрбайджан працягвае пасьлядоўны курс абароны сваіх нацыянальных інтарэсаў і дэманструе, што ня мае намераў цярпець вонкавае ўмяшаньне ў свае ўнутраныя справы, незалежна ад таго, адкуль яно адбываецца».
Раней улады Азэрбайджану ўхвалілі аналягічнае рашэньне датычна амэрыканскага агенцтва USAID, а пазьней і зьліквідавалі яго прадстаўніцтва на тэрыторыі сваёй краіны.
«Наша краіна сама стала донарам і не патрабуе дапамогі звонку, асабліва калі такая дапамога аказваецца на падставе непразрыстых схем, а структура мае адкрыта выведны характар», — працытавала выданьне сваю крыніцу.
ГЛЯДЗІЦЕ ТАКСАМА: Азэрбайджан пашырыў забарону на авіярэйсы ў Расею ва ўмовах вайныШто такое «Россотрудничество»
Расейскае дзяржаўнае агенцтва «Россотрудничество» займаецца расейцамі за мяжой і прасоўваньнем расейскай культуры і інтарэсаў.
У Беларусі «Россотрудничество», якое знаходзіцца пад санкцыямі ЭЗ і Ўкраіны, мае свае «расейскія дамы» ў Менску, Гомлі, Горадні і Берасьці.
Сярод афіцыйных мэтаў арганізацыі — прасоўваньне расейскай адукацыі, навукі і культуры, умацаваньне пазыцый расейскай мовы, гісторыка-мэмарыяльная дзейнасьць.
ГЛЯДЗІЦЕ ТАКСАМА: У Беларусі адкрылі чацьвёрты «Расейскі дом» — гэтым разам у Горадні