Стала вядома пра сьмерць у ізалятары Белгараду расейскага валянтэра, які дапамагаў украінцам

У Белгарадзкім сьледчым ізалятары № 3 памёр мясцовы валянтэр Аляксандар Дземідзенка, які дапамагаў украінскім уцекачам.

Як паведаміў праект Белсату «Вот так», мужчына памёр яшчэ 5 красавіка, але адвакат даведаўся пра гэта толькі праз тры дні.

Алег, сын валянтэра, ня выключыў, што ягоны бацька мог загінуць у выніку суіцыду. «Яго псыхалягічна забівалі паўгода ў СІЗА без спатканьняў з сваякамі і хаця б кніг», — напісаў ён.

У кастрычніку 2023 году Telegram-канал «Пепел» паведаміў, што Аляксандра Дземідзенку выкралі невядомыя ў той момант, калі ён прывёз насілкі для анкалягічна хворай жанчыны на кантрольна-прапускны пункт «Калацілаўка». Пазьней ягоная жонка Натальля расказала, што калі Аляксандра прывезьлі дадому, на ягоным целе было шмат сінякоў.

Неўзабаве валянтэра арыштавалі на 10 содняў паводле адміністрацыйнай справы за нібыта спажываньне алькаголю ў забароненым месцы, а на пачатку лістапада 2023 году — ужо ў межах крымінальнай справы паводле падазрэньня ў «незаконным абарачэньні зброі». Паводле сьледзтва, ён нібыта захоўваў дома выбухоўку. Сам Дземідзенка сьцьвярджаў, што знайшоў выбуховае рэчыва, але не пасьпеў перадаць яго ў паліцыю

Пазьней Telegram-канал «Можем объяснить» са спасылкай на сына валянтэра паведаміў, што супраць Аляксандра Дземідзенкі завялі яшчэ адну справу — паводле артыкула аб дзяржаўнай здрадзе. Але адвакатка валянтэра Алена Палымава зьняпраўдзіла гэтае паведамленьне.

Аляксандру Дземідзенку двойчы працягвалі арышт на 2 месяцы. Апошні раз — у лютым. Тэрмін апошняга арышту меўся скончыцца 21 красавіка.