Архітэктар-рэстаўратар Сяргей Багласаў нарадзіўся ў Магілёве, скончыў Палітэхнічны інстытут па спэцыяльнасьці «архітэктура». Інфармацыю пра ягоную сьмерць «Нашай ніве» пацьвердзілі ў Беларускім саюзе архітэктараў.
Асноўная праца Багласава — рэстаўрацыя, рэканструкцыя, прыстасаваньне і добраўпарадкаваньне сталічнага Траецкага прадмесьця Менску (1980–1983). Багласаў кіраваў аўтарскім калектывам.
Таксама ён распрацаваў праекты рэстаўрацыі, прыстасаваньня і аднаўленьня гандлёвых радоў на плошчы Свабоды, менскай гарадзкой ратушы, гасьцініцы «Эўропа», царквы Сьвятога Духу, шматфункцыянальных комплексаў на вуліцах Няміга і Зыбіцкая. Некаторыя праекты рабіліся ў суаўтарстве.
Пры гэтым архітэктара рэзка крытыкавалі за праект рэканструкцыі Менскага замчышча.
Багласаў быў таксама вядомы як аўтар архітэктурна-скульптурных кампазыцый — «Войт» і «Гарадзкія вагі» у Менску. Ён таксама распрацаваў пастамэнт да помніка Гедзіміну ў Лідзе.
ГЛЯДЗІЦЕ ТАКСАМА: Памёр гісторык Уладзімер Гуленка, дасьледнік дзейнасьці УПА і Арміі Краёвай у Беларусі ГЛЯДЗІЦЕ ТАКСАМА: На 64-м годзе памёр пісьменьнік і выдавец Уладзімер Сіўчыкаў. У яго быў каранавірус